O Concello de Porto do Son vén de adherirse ao programa “Migramar Proemprego”, posto en marcha pola ONG Movemento pola Paz – Galicia, para promover a inserción laboral da poboación inmigrante no sector pesqueiro.
Así, da man de Movemento pola Paz, o pasado mércores, 5 de novembro, levouse a cabo unha reunión cos representantes da entidade para coñecer o proxecto piloto “Migramar Proemprego”, do que forma parte o municipio sonense, e que ten a pretensión de garantir o relevo xeracional no sector.
A dita reunión asistiron as dúas traballadoras sociais do concello e o concelleiro de Deportes e Xuventude, Carlos Lorenzo xunto á representante da ONG, Susana Fernández Delegada e a técnica laboral, Beatriz García.
O programa, de carácter gratuíto, ten como obxectivo principal a regularización da situación das persoas inmigrantes de cara ao seu emprego no sector pesqueiro.
A través de accións de orientación xurídico-laboral e formativas, as persoas participantes poderán adquirir as competencias idiomáticas e dixitais básicas para un correcto desenvolvemento no sector con plena autonomía. Ademais, poderán obter tamén as titulacións oficiais necesarias para a súa inserción laboral no sector pesqueiro.
O colectivo prioritario de atención será o de poboación inmigrante, menores de 30 anos, procedentes de países da costa do norte de África e con algún tipo de experiencia previa no mundo da pesca.
Segundo a previsión establecida, o proxecto poñerase en marcha a comezos do ano 2026 coa capacitación dixital e a formación en idiomas para, a continuación, comezar coa formación profesional habilitante para o sector.
Nos vindeiros días comezará a facerse a selección das persoas participantes. Aquelas persoas interesadas en participar ou en obter máis información, poderán contactar coa área de Benestar Social do Concello de Porto do Son a través teléfono 981 8674 14.
