O Concello de Porto do Son continúa coa súa firme aposta por renovar e optimizar a rede viaria do municipio. Así, recentemente rematou as obras de mellora do vial Campo de Patas, na parroquia de San Pedro de Muro.
A actuación, que ten un investimento total de 73.465 euros, conta co financiamento de 57.947 euros a cargo da Axencia Galega de Desenvolvemento Rural (AGADER), tendo unha aportación de 15.518 euros de fondos propios municipais.
A intervención, que ten o obxectivo de rehabilitar e mellorar o firme da vía existente, garante tamén unha maior seguridade viaria, comodidade na circulación e durabilidade da infraestrutura.
Esta obra responde directamente ás solicitudes da veciñanza da zona, quen manifestara a necesidade de reparar o firme debido a fochancas, gretas e perda de adherencia. Co remate destas obras, o Concello de Porto do Son reafirma o seu compromiso co mantemento e a modernización da rede viaria municipal, contribuíndo a mellorar a mobilidade da veciñanza, a seguridade nas súas viaxes diarias e a conexión entre os distintos núcleos de poboación do municipio.
Tras a actuación, o alcalde, Luis Oujo, indicou que “con esta actuación continuamos dando resposta ás demandas veciñais e seguimos traballando a diario para mellorar as infraestruturas da nosa vila”.
“Desde este equipo de goberno continuamos coa firme aposta por seguir mellorando a nosa rede viaria, buscando manter o bo estado dos accesos rurais, facilitando a mobilidade dos nosos veciños e veciñas e contribuíndo ao desenvolvemento rural”, rematou.
