O Concello de Porto do Son impulsa a práctica deportiva a través da publicación da convocatoria para a concesión de becas a deportistas individuais do municipio.
O obxectivo desta iniciativa é apoiar e fomentar a práctica e o rendemento deportivo das persoas deportistas sonenses que destacasen pola súa traxectoria competitiva ao longo do último ano.
Liñas de axuda
Establécense tres modalidades de bolsas:
- Beca A: para deportistas de disciplinas olímpicas ou paralímpicas que formen parte de seleccións nacionais absolutas, con opción de clasificarse para os próximos Xogos Olímpicos. Dotación: 2.500 €, a repartir entre as tres mellores puntuacións.
- Beca B: para outros/as deportistas que destacasen en competicións oficiais durante o ano de referencia. Dotación máxima: 1.000 €, a repartir entre as tres mellores puntuacións.
- Beca C: destinada a deportistas das categorías infantil e cadete. Dotación máxima: 1.500 €, a repartir entre as tres mellores puntuacións.
As persoas solicitantes deberán optar por unha única modalidade, xa que son incompatibles entre si.
Requisitos principais
Poderán solicitar estas bolsas as persoas que:
- Estean empadroadas en Porto do Son con, polo menos, tres anos de antigüidade.
- Conten cunha licenza federativa vixente.
- Estean ao corrente das súas obrigas fiscais e coa Seguridade Social.
- Practiquen un deporte olímpico ou paralímpico, podendo tamén considerarse outros deportes de especial relevancia competitiva.
Presentación de solicitudes
As persoas interesadas poderán presentar as súas solicitudes ata o vindeiro 6 de novembro a través do Rexistro Xeral do Concello de Porto do Son ou da Sede Electrónica municipal, empregando o formulario normalizado ANEXO I da solicitude de subvención.
O alcalde, Luis Oujo destacou que “a través desta iniciativa queremos axudar e impulsar a deportistas que, grazas ao seu esforzo e dedicación, están a conseguir grandes resultados en probas de ámbito autonómico, nacional e incluso internacional”.
“É importante lembrar que todos e todas elas supoñen un orgullo para Porto do Son e, por iso, consideramos fundamental favorecer e impulsar, na medida do posible, as súas carreiras deportivas”, rematou o rexidor.
DESCARGA ANEXO I da solicitude de subvención
DESCARGA ANEXO II – Competicións a valorar
DESCARGA ANEXO III – Declaración responsable
DESCARGA ANEXO IV – Aceptación da subvención
Máis información na orde do BOP
