Impulsando o turismo pesqueiro.
O proxecto Azul de Portosín Turismo Mariñeiro busca xestionar de forma integral o porto pesqueiro e reforzar a marca Azul de Portosín, destacando a interacción directa cos profesionais do mar, sendo os armadores do cerco un dos elementos centrais do desenvolvemento do proxecto.
O éxito da iniciativa depende tamén da colaboración estreita entre os dous socios, Concello e Confraría, que xa en 2021 puxeron en marcha o proxecto “Visibilización da identidade mariñeira do Porto de Portosín”, no que se creou o punto de información de turismo mariñeiro, agora convertido nun eixo clave desta nova proposta.
A actividade social, cultural, recreativa, hostaleira e turística de Portosín xira arredor do fronte marítimo e do porto, sendo os espazos destinados á actividade pesqueira os predominantes. O obxectivo é optimizar as instalacións, equipamentos e zonas infrautilizadas para xerar un turismo baseado no coñecemento e na difusión da tradición e valores da cultura mariñeira e pesqueira, especialmente dun porto especializado na pesca de peixe azul. Todo isto alinase coa estratexia da marca de calidade “Azul de Portosín”.
O principal activo do proxecto é a súa autenticidade: os visitantes teñen a oportunidade de vivir en primeira persoa o traballo dos mariñeiros e coñecer de cerca o produto da súa pesca.
O proxecto implica á Confraría de Pescadores de Portosín e o Concello de Porto do Son. O proxecto ten un presuposto de 309.878,38 €, e conta co apoio GALP Costa Sostible, grazas ao cal obtivemos unha axuda total do 100%, financiada polo FEMPA-Fondo Europeo Marítimo, de Pesca e de Acuicultura (70%, 216.914,87 €) e a Consellería do Mar (30%, 92.963,51).
A axuda repártese do seguinte xeito:
- Confraría de Portosín: 231.727,08 €
- Concello de Porto do Son: 78.151,30 €
